Fréttasafn
29. júní 2010
PFS kallar eftir samráði vegna boðaðra breytinga Íslandspósts á skilmálum um póstþjónustu
Nánar
Póst- og fjarskiptastofnun (PFS) efnir til samráðs við hagsmunaaðila vegna breytinga sem Íslandspóstur hefur boðað á skilmálum fyrirtækisins um póstþjónustu Með bréfi, dags. 28. júní 2010 tilkynnti Íslandspóstur Póst- og fjarskiptastofnun að fyrirtækið hyggðist breyta vöruframboði fyrirtækisins frá því sem nú er. Breytingin er m.a. fólgin í því að boðið verður upp á tvo vöruflokka innan einkaréttar (0-50 gr.), sbr. 7. gr. laga um póstþjónustu nr. 19/2002, sbr. 11. gr. rekstarleyfis Íslandspósts, dags. 3. desember 2007, „Almennur póstur“ og „Magnpóstur“. Með tilkynningu Íslandspósts fylgdu afrit af fyrirhuguðum skilmálum og verðskrá fyrir almennan póst og magnpóst, ásamt greinargerð um kostnaðargrundvöll breytinganna. Samkvæmt 1. mgr. 16. gr. laga um póstþjónustu nr. 19/2002 skulu póstrekendur birta opinberlega almenna viðskiptaskilmála sem um þjónustuna gilda. Nýja og breytta skilmála skal senda Póst- og fjarskiptastofnun a.m.k. fimm virkum dögum fyrir gildistöku þeirra. Ákvæðið gerir hins vegar ekki ráð fyrir að PFS samþykki fyrirfram nýja eða breytta skilmála áður en þeir taka gildi, sbr. ákvörðun PFS nr. 1/2010. Stofnunin getur hins vegar hvenær sem er krafist breytinga á skilmálum ef þeir brjóta gegn lögum, reglugerðum eða ákvæðum rekstrarleyfis. Þá er og kveðið á um í 6. mgr. 16. gr. laganna að rekstarleyfishafa sem falinn er einkaréttur ríkisins skuli gefa út sérstaka gjaldskrá fyrir þjónustu sem lýtur einkarétti. Gjaldskrána skal leggja fyrir Póst- og fjarskiptastofnun til samþykkis eigi síðar en 15 virkum dögum fyrir gildistöku. Óljóst er á þessari stundu hvaða áhrif boðaðar breytingar Íslandspósts munu hafa á markaðinn hér á landi, sérstaklega á það við um þá viðskiptavini Íslandspósts, sem njóta þeirra kjara sem kveðið er á um í 5. mgr. 16. gr. laga um póstþjónustu, sbr. núgildandi skilmála Íslandspósts, Magnafslættir – stórnotendur. Vegna þessa hefur Póst- og fjarskiptastofnun ákveðið að kalla eftir sjónarmiðum hagsmunaðila varðandi þær breytingar sem boðaðar hafa verið af hálfu Íslandspósts. Helstu breytingar eru t.d. að fært er inn í skilmála ákvæði um tímalengd útburðar varðandi þann póst sem fellur undir fyrirtækjapóst, skilyrði um frágang á honum og kveðið er á um ný afsláttarskilyrði fyrir slíkan póst. Athugasemdir hagsmunaaðila skulu berast stofnuninni fyrir 20. júlí n.k. Til að auðvelda vinnu PFS við yfirferð athugasemda skal vísa til viðeigandi skilmála með númeri og/eða til þess orðalags skilmála sem verið er að gera athugasemdir við í hvert sinn. Póst- og fjarskiptastofnun mun í framhaldinu fara yfir þær athugasemdir sem fram kunna að koma og taka formlega ákvörðun um efnisatriði þeirra skilmála sem nú hafa verið birtir af hálfu Íslandspósts, sbr. 1. mgr. 16. gr. laga um póstþjónustu nr. 19/2002 og 9. gr. laga nr. 69/2003 um Póst- og fjarskiptastofnun. Rétt er að geta þess að samkomulag hefur náðst við Íslandspóst um að boðaðar breytingar muni ekki taka gildi fyrr en að lokinni formlegri málsmeðferð stofnunarinnar. Tilkynning Íslandspósts um breytingu á skilmálum og verðskrá, dags 28. júní 2010 (PDF) Fyrirhugaðir viðskiptaskilmálar Íslandspósts (PDF) Fyrirhuguð verðskrá Íslandspósts (PDF)
28. júní 2010
Norrænn samanburður á fjarskiptanotkun: Netnotkun með farsímum og netlyklum minnst á Íslandi
Nánar
Íslendingar sækja minna af gögnum á Netið í gegn um farsíma og netlykla en aðrar þjóðir á Norðurlöndum og áskrifendur að gagnaflutningi um breiðband (e. mobile broadband) eru einnig fæstir hér miðað við höfðatölu Á sama tíma er útbreiðsla DSL nettenginga (t.d. ADSL) mest hér á landi. Þetta er meðal þess sem fram kemur í nýrri skýrslu þar sem bornir eru saman fjarskiptamarkaðir á Norðurlöndum. Skýrslan var tekin saman af vinnuhópi um norræna tölfræði vegna fundar forstjóra fjarskiptaeftirlitsstofnananna á Norðurlöndunum. Ein af skýringum þess að Íslendingar eru ekki komnir eins langt í netnotkun með farsímum og netlyklum og aðrar þjóðir á Norðurlöndum er að 3G nettengingar voru fyrst í boði hér á landi á seinni hluta ársins 2007 en hafa verið lengur í boði á hinum Norðurlöndunum. Þegar skýrslan er skoðuð í heild má þó segja að samanburðurinn sýni að ekki er mikill munur á fjarskiptanotkun fólks í þessum löndum. Meðal annars sem fram kemur í skýrslunni er að: Notendum fækkar í fastaneti á öllum Norðurlöndunum og mínútum í heimasíma fækkar einnig. Fjöldi mínútna úr farsíma er síhækkandi hlutfall af öllum mínútum sem talað er í síma á Norðurlöndum. Finnar eru með mestu notkun í farsíma. Meðallengd símtals í farsíma er styst hér á landi en lengst í Finnlandi. Danir senda flest SMS en Íslendingar fæst. Mikil aukning hefur átt sér stað í fjölda SMS sendinga í Svíþjóð. Skýrsluna má skoða í heild hér fyrir neðan. Telecommunication Markets in the Nordic Countries 2010 (PDF) (Á ensku)
22. júní 2010
Úrskurðarnefnd staðfestir úrskurð PFS um afturköllun á tíðniheimild IceCell fyrir GSM 1800
Nánar
Úrskurðarnefnd fjarskipta- og póstmála hefur staðfest ákvordun PFS frá því í mars sl. um að afturkalla tíðniheimild IceCell ehf. fyrir GSM farsímanet á 1800 MHz tíðnisviðinu. Var tíðniheimildin afturkölluð vegna vanefnda fyrirtækisins á að standa við skilmála heimildarinnar, sem kvað á um uppbyggingu farsímanets í áföngum fyrir tiltekin tímamörk. Sjá nánar: Úrskurður úrskurðarnefndar fjarskipta- og póstmála í máli nr. 1/2010 (PDF) - 15. júní 2010 Ákvörðun PFS nr. 5/2010 Afturköllun á tíðniheimild IceCell ehf. fyrir GSM 1800 farsímanet (PDF) - 11. mars 2010
22. júní 2010
Reiknivél PFS verður opnuð í dag
Nánar
Kl. 13:30 í dag mun Kristján L. Möller ráðherra samgöngu- og sveitarstjórnarmála opna nýjan vef Póst- og fjarskiptastofnunar, Reiknivél PFS, að viðstöddum fjölmiðlum og gestum. Tilgangur reiknivélarinnar er að auðvelda neytendum að átta sig á flóknum fjarskiptamarkaði og bera saman verð á þjónustuleiðum fjarskiptafyrirtækjanna fyrir heimasíma, farsíma og ADSL nettengingar. Reiknivél PFS tekur til algengustu innanlandsnotkunar á heimasíma og farsíma og niðurhals á gögnum erlendis frá með ADSL tengingum. Hægt er að fara tvær leiðir við notkun vélarinnar fyrir heimasíma og farsíma: Nota hreyfanlegan kvarða þar sem gengið er út frá meðalgildum fyrir litla til mikla notkun eða slá inn eigin tölur um notkun. Við útreikning ber reiknivélin saman verðskrár fjarskiptafyrirtækjanna fyrir sambærilegar þjónustuleiðir. Ekki er gert ráð fyrir að reiknivélin verði notuð til að sannreyna símareikninga einstakra notenda. Ástæður þess eru m.a. einstaklingsbundin sérkjör s.s. vinanúmer, dreifing á lengd símtala sem er mjög einstaklingsbundin, auk þess sem reikningar fjarskiptafyrirtækjanna eru mismunandi og misjafnt hvaða upplýsingar koma fram. Á vefnum Reiknivél PFS, eru einnig leiðbeiningar um notkun vefsins, spurningar og svör varðandi virkni reiknivélarinnar, skýringar á forsendum útreikninga og hlekkir á gagnlegan fróðleik fyrir neytendur um ýmislegt sem varðar farsíma-, heimasíma- og netþjónustu.
22. júní 2010
Vefurinn Reiknivél PFS opnaður - Verðsamanburður fyrir neytendur
Nánar
Póst- og fjarskiptastofnun hefur opnað vefinn Reiknivél PFS (www.reiknivél.is). Tilgangur reiknivélarinnar er að auðvelda neytendum að átta sig á flóknum fjarskiptamarkaði og bera saman verð á þjónustuleiðum fjarskiptafyrirtækjanna fyrir heimasíma, farsíma og ADSL nettengingar. Reiknivél PFS tekur til algengustu innanlandsnotkunar á heimasíma og farsíma og niðurhals á gögnum erlendis frá með ADSL tengingum. Kristján L. Möller ráðherra samgöngu- og sveitarstjórnarmála opnaði vefinn í dag að viðstöddum gestum. Hægt er að fara tvær leiðir við notkun vélarinnar fyrir heimasíma og farsíma: Nota hreyfanlegan kvarða þar sem gengið er út frá meðalgildum fyrir litla til mikla notkun eða slá inn eigin tölur um notkun. Við útreikning ber reiknivélin saman verðskrár fjarskiptafyrirtækjanna fyrir sambærilegar þjónustuleiðir. Ekki er gert ráð fyrir að reiknivélin verði notuð til að sannreyna símareikninga einstakra notenda. Ástæður þess eru m.a. einstaklingsbundin sérkjör s.s. vinanúmer, dreifing á lengd símtala sem er mjög einstaklingsbundin, auk þess sem reikningar fjarskiptafyrirtækjanna eru mismunandi og misjafnt hvaða upplýsingar koma fram. Á vefnum Reiknivél PFS, eru einnig leiðbeiningar um notkun vefsins, spurningar og svör varðandi virkni reiknivélarinnar, skýringar á forsendum útreikninga og hlekkir á gagnlegan fróðleik fyrir neytendur um ýmislegt sem varðar farsíma-, heimasíma- og netþjónustu. www.reiknivél.is
14. júní 2010
PFS samþykkir viðmiðunartilboð Símans um bitastraumsaðgang, með fyrirmælum um breytingar
Nánar
Póst- og fjarskiptastofnun (PFS) hefur birt ákvörðun sína nr. 12/2010, frá 19. maí 2010, um breytingar á skilmálum viðmiðunartilboðs Símans hf. um bitastraumsaðgang (markaður 12). Með ákvörðun PFS nr. 8/2008, um útnefningu fyrirtækis með umtalsverðan markaðsstyrk og álagningu kvaða á heildsölumarkaði fyrir breiðbandsaðgang, var Síminn útnefndur með umtalsverðan markaðsstyrk á markaði 12 auk þess sem kvöð var lögð á Símann um gagnsæi og að útbúa og birta opinberlega viðmiðunartilboð um bitastraumsaðgang og tengda aðstöðu og þjónustu.Síminn birti viðmiðunartilboð sitt um bitastraumsaðgang þann 1. júlí 2009. Bárust PFS athugasemdir vegna viðmiðunartilboðsins sem áframsendar voru Símanum og fyrirtækinu gefinn kostur á að skila inn umsögn til stofnunarinnar um þau atriði sem gerðar voru athugasemdir við. Bárust stofnuninni athugasemdir Símans með bréfi þann 19. október 2009. Með hliðsjón af framkomnum athugasemdum og endurskoðun PFS á viðmiðunartilboðinu var niðurstaða PFS sú að óhjákvæmilegt væri að gera breytingar á einstaka ákvæðum viðmiðunartilboðsins til að það yrði í samræmi við skilgreind markmið samkvæmt ákvörðun PFS nr. 8/2008. Með ákvörðun nr. 12/2010 samþykkir PFS viðmiðunartilboð Símans um bitastraumsaðgang, með þeim breytingum sem mælt er fyrir um í viðauka við ákvörðunina. PFS hafnar kröfu Símans um að verðskrá skuli bundin trúnaði og leggur fyrir fyrirtækið að birta hana sem hluta af viðmiðunartilboðinu.Verðskrá Símans (Viðauki 1) skal vera í samræmi við ákvörðun PFS nr. 7/2010 frá og með 1. maí s.l. auk þess að innihalda heildsöluverð fyrir þær vörur sem í boði eru samkvæmt fyrirmælum PFS í kafla 5.3.1, þ.m.t. VDSL, G.SHDSL og Annex-M. Skal Síminn uppfæra viðmiðunartilboðið í samræmi við fyrirmæli PFS samkvæmt ákvörðuninni og birta það á aðgengilegan hátt á vefsíðu sinni. Ákvörðun PFS í heild:Ákvörðun PFS nr. 12/2010 um viðmiðunartilboð Símans um bitastraumsaðgang. (PDF)
14. júní 2010
Samráð við ESA vegna markaðsgreiningar á markaði 7
Nánar
Í dag sendi Póst- og fjarskiptastofnun (PFS) til Eftirlitsstofnunar EFTA (ESA) drög að ákvörðun um útnefningu fyrirtækja með umtalsverðan markaðsstyrk og álagningu kvaða á heildsölumörkuðum fyrir lúkningu símtala í einstökum farsímanetum (markaður 7). PFS hefur komist að þeirri niðurstöðu að Síminn hf. sé með umtalsverðan markaðsstyrk á mörkuðum fyrir lúkningu símtala í GSM/UMTS og NMT farsímanet sín og hyggst útnefna félagið með umtalsverðan markaðsstyrk á þeim. PFS hefur einnig komist að þeirri niðurstöðu að Og fjarskipti ehf. (Vodafone), Nova ehf. og IMC Ísland ehf. séu með umtalsverðan markaðsstyrk á mörkuðum fyrir lúkningu símtala í GSM/UMTS farsímanet sín. Drög að ákvörðun á markaði 7 voru send til ESA og annarra eftirlitsstofnana á EES-svæðinu með vísan til 7. gr. laga nr. 69/2003 um Póst- og fjarskiptastofnun. ESA og aðrar eftirlitsstofnanir EES hafa einn mánuð til að setja fram athugasemdir við ákvörðunardrögin. Eftir það getur PFS formlega tekið ákvörðun um viðkomandi markað nema fram komi óskir hjá ESA um að draga ákvörðunardrögin til baka. Sjá nánar hér á vefnum Nánari upplýsingar og skjöl tengd samráðinu við ESA Upplýsingar um markaðsgreiningu
31. maí 2010
Ákvörðun PFS um fjárhagslegan aðskilnað milli Orkuveitu Reykjavíkur og Gagnaveitu Reykjavíkur
Nánar
Póst- og fjarskiptastofnun (PFS) hefur birt ákvörðun sína nr. 14/2010 um fjárhagslegan aðskilnað milli Orkuveitu Reykjavíkur sf. (OR) og Gagnaveitu Reykjavíkur ehf. (GR). Í ákvörðun stofnunarinnar er m.a. komist að þeirri niðurstöðu að GR þurfi að fá fyrirfram samþykki PFS fyrir hlutafjáraukningum sem OR, eða annað fyrirtæki innan fyrirtækjasamstæðunnar, er greiðandi að. PFS samþykkir því aðeins slíka hlutafjáraukningu að hún rúmist innan eðlilegs fjárhagslegs aðskilnaðar og feli ekki í sér að samkeppnisrekstur sé niðurgreiddur af einkaleyfisstarfsemi. Ennfremur að skammtímaskuldir GR við OR, eða önnur félög innan samstæðunnar, megi ekki nema hærri fjárhæð en sem nemur tveggja mánaða eðlilegum viðskiptum milli aðilanna á hverjum tíma, eins og um ótengda aðila sé að ræða. Eftirlit með fjárhagslegum aðskilnaði hjá ofangreindri fyrirtækjasamstæðu, og öðrum sambærilegum aðilum, er viðvarandi verkefni stofnunarinnar, sbr. 36. gr. fjarskiptalaga. Ofangreind ákvörðun er sú þriðja í röðinni sem snýr að fjarskiptastarfsemi samstæðunnar. Hinar voru frá árunum 2006 og 2008. Í ákvörðun PFS nr. 14/2010 leggur PFS ofangreindar kvaðir á GR þar sem niðurstaða stofnunarinnar var á þá leið að framkvæmd á fjárhagslegum aðskilnaði á fjarskiptastarfsemi OR, sem rekin er í dótturfélaginu GR, frá annarri og sérleyfisbundinni starfsemi samstæðunnar, væri ófullnægjandi varðandi umrædd tvö atriði. PFS mun í framhaldi af ákvörðun þessari kanna hvort uppfærð arðsemiskrafa OR/GR, frá því í mars 2010, og áætlanir félaganna um þróun hennar á næstu árum teljist eðlileg miðað við aðstæður og samræmist eðlilegri fjárhagslegri aðgreiningu. Ennfremur mun stofnunin rannsaka og leggja mat á hvort hlutafjáraukning sú sem samþykkt var á hluthafafundi í GR í desember 2008 brjóti í bága við 36. gr. fjarskiptalaga um fjárhagslegan aðskilnað og/eða tilmæli þau sem PFS hefur beint að fyrirtækjunum í fyrri ákvörðunum sínum. Þá mun PFS skoða önnur atriði er varða fjárhagslegan aðskilnað innan samstæðunnar eftir því sem þurfa þykir um leið og ástæða þykir til. Ákvörðun PFS í heild:Ákvörðun PFS nr. 14/2010 Um fjárhagslegan aðskilnað milli Orkuveitu Reykjavíkur s.f. og Gagnaveitu Reykjavíkur ehf. (PDF) Eldri ákvarðanir PFS varðandi fjarskiptastarfsemi OR (PDF skjöl): 2006: Ákvörðun um fjárhagslegan aðskilnað fjarskiptastarfsemi Orkuveitu Reykjavíkur, 13. nóvember 2006 2008: Ákvörðun nr. 32/2008 - Um fjárhagslegan aðskilnað milli Orkuveitu Reykjavíkur og Gagnaveitu Reykjavíkur - ásamt Viðauka - 30. desember 2008