Fréttasafn
13. ágúst 2010
Síminn hættir rekstri NMT farsímakerfisins hér á landi
Nánar
Þann 1. september næstkomandi mun Síminn hætta rekstri NMT farsímakerfisins hér á landi. Mikil uppbygging hefur átt sér stað á GSM og UMTS (3G) kerfum fjarskiptafélaganna á undanförnum árum en það eru þau kerfi sem taka munu við þeirri þjónustu sem NMT farsímakerfið hefur þjónustað hingað til á landi og sjó. Þar sem eðli hinnar nýju þjónustu er á margan hátt annað en NMT þjónustunnar er næsta víst að einhver örfá svæði ná ekki sömu dekkun og áður, á hinn bóginn er ljóst að í heildina er dekkun GSM og 3G kerfanna miklum mun viðameiri en NMT kerfisins nokkru sinni var til lands og sjávar sé miðað við handsímaþjónustu. PFS vill benda notendum NMT kerfisins á að hægt er að flytja númerin sem hafa verið í notkun í NMT kerfinu yfir í GSM eða 3G þjónustu fjarskiptafélaganna. Upplýsingar um þjónustusvæði fjarskiptafélaganna (í stafrófsröð) er að finna á eftirfarandi slóðum: Nova: http://www.nova.is/content/thjonusta/thjonustusvaedi/Innanlands.aspx?startpage=true Síminn: http://siminn.is/servlet/file/dreifikerfi_20jun2010-3G_3GL_sjoaskrift.pdf?ITEM_ENT_ID=146748 Vodafone (Og fjarskipti): http://www.vodafone.is/live/staersta Í ljósi þess að NMT tíðnisviðið losnar frá 1. September er það laust til umsóknar.
12. ágúst 2010
Vegna umfjöllunar um úttekt PFS á framkvæmd reglugerðar um reiki
Nánar
Á vefsíðu Neytendasamtakanna birtist nýlega niðurstaða úttektar samtakanna á framkvæmd fjarskiptafyrirtækjanna á reglugerðum Evrópuþingsins og -ráðsins um reiki á almennum farsímanetum innan EES-svæðisins. Um er að ræða reglugerð nr. 717/2007/EB, og reglugerð til breytingar á henni nr. 544/2009. Ber niðurstöðu Neytendasamtakanna ekki að öllu leyti saman við sambærilega úttekt sem Póst- og fjarskiptastofnun framkvæmdi fyrr í sumar. Af þessu tilefni vill Póst- og fjarskiptastofnun (PFS) taka fram eftirfarandi: Aurajöfnun. Þegar virðisaukaskattur (vsk.) hefur verið lagður ofan á verðþak Evrópugjaldskrárinnar námunda sum fjarskiptafyrirtæki upp í næstu heilu tölu, þ.e. í þeim tilvikum sem brot úr evru-senti (e. euro-cent = 1 hundraðasti af evru) stendur nær næsta heila evru-senti fyrir ofan en því fyrir neðan, sbr. almennar námundunarreglur. Leiðir þetta til þess að í sumum tilvikum fer hámarksverð án vsk. upp fyrir verðþakið sem tiltekið er í Evrópugjaldsskránni. Þetta getur numið nokkrum hundraðshlutum af evru-senti. Í slíkum tilvikum er um svo óverulega hækkun að ræða að venjubundnar sveiflur á gengi evru ráða mun meira um endanlegt verð til neytenda. Þá telur PFS að horfa verði til þess að aurajöfnun er almenn og rótgróin viðskiptavenja sem tíðkast hér á landi eins og í öðrum Evrópulöndum. Treystir PFS sér ekki til þess að slá því föstu, án frekari skoðunar, að slík framkvæmd brjóti í bága við umrædda reglugerð. Leiði ítarlegri skoðun á því í ljós að úrbóta sé þörf mun PFS koma því á framfæri við fjarskiptafyrirtækin. Verðþak fyrir móttekin símtöl í smásölu þann 1. júlí 2010. Komið hefur í ljós að í spurningalista, sem PFS sendi fjarskiptafyrirtækjunum í tengslum við úttekt sína, var í spurningu um hámarksverð fyrir móttekin símtöl í smásölu frá og með 1. júlí 2010 vísað til eldra verðþaks, þ.e. 0,22 evra í stað nýja verðþaksins sem skyldi vera 0,15 evrur. Í ljósi þessarar meinlegu villu var ekki gerð athugasemd við það að Vodafone (og einnig Tal, sbr. hér að neðan) skyldi styðjast við hið ranga verðþak. Hefur tilmælum þegar verið beint til Vodafone að leiðrétta verðskrá sína til samræmis við gildandi verðþak. Reikigjaldskrá Tals. Fjarskiptafyrirtækið Tal sem hefur endursölusamning við Vodafone hefur notað sama verð og Vodafone í reikningum til viðskiptavina sinna. Þegar Vodafone hefur lagfært verð hjá sér, sbr. framangreint, mun verð Tals einnig leiðréttast samhliða. Upplýsingar á vefsíðu Tals um reikiverð, hafa ekki verið réttar og ekki í samræmi við þá framkvæmd sem um þetta hefur gilt hjá fyrirtækinu. Hefur þetta verið staðfest við PFS af hálfu Tals og mun fyrirtækið leiðrétta reikiverðskrá á heimasíðu sinni. Póst- og fjarskiptastofnun hefur uppfært úttekt sína á framkvæmd reikireglugerða nr. 717/2007/EB og nr. 544/2009/EB til samræmis við framangreint. Sjá Úttekt PFS á framkvæmd reglugerðar um alþjóðlegt reiki á almennum farsímanetum – 12. ágúst 2010 (PDF)
27. júlí 2010
Nýjar reglur nr. 617/2010 um númera- og þjónustuflutning í almennum fjarskiptanetum
Nánar
Með birtingu í stjórnartíðindum þann 22. júlí s.l. hafa tekið gildi endurskoðaðar reglur nr. 617/2010 um númera- og þjónustuflutning í almennum fjarskiptanetum. Meginmarkmið breytinganna var að auka skilvirkni og hraða við framkvæmd númeraflutnings, m.a. í samræmi við kröfur tilskipunar Evrópuþingsins og Ráðsins nr. 2009/136/EB um breytingu á tilskipun nr. 2002/22/EB um alþjónustu og réttindi notenda að því er varðar rafræn fjarskiptanet og -þjónustu. Við endurskoðun reglnanna horfði Póst- og fjarskiptastofnun (PFS) einnig til breytinga sem eru til þess fallnar að skýra réttindi neytenda og réttindi og skyldur fjarskiptafyrirtækja varðandi framkvæmd númera- og þjónustuflutnings og afmarka nánar eftirlitsúrræði PFS. Helstu nýmæli reglnanna eru eftirfarandi: Afgreiðslutími flutningsbeiðna í far- og talsímanetum verður að meginreglu til einn virkur dagur. Áfram mun gilda undantekningarregla varðandi talsímanetið við tilteknar aðstæður. Formskilyrði sett fyrir rétthafabreytingum á númerum. Upplýsingaskylda fjarskiptafyrirtækja til neytenda um framkvæmd flutnings. Ítarlegra ákvæði um upplýsingaskyldu fjarskiptafyrirtækja til PFS, t.d. um skil á gögnum á stöðluðu formi, sem einnig nær til Hins íslenska númerafélags ehf. (HÍN). Heimild til að synja um númeraflutning vegna vanskila, nema um sé að ræða notanda á einstaklingsmarkaði. Rýmra svigrúm fjarskiptafyrirtækja til að hafa samband við fráfarandi viðskiptavini sína í númeraflutningsferli eftir að tiltekin takmörkun þar að lútandi var felld brott. Reglurnar eru birtar í Stjórnartíðindum. Skýringar sem fylgdu reglubreytingunum í samráðsferli við markaðsaðila þann 30. mars sl.
19. júlí 2010
Úttekt á framkvæmd reglugerðar um alþjóðlegt reiki á almennum farsímanetum
Nánar
Þann 1. júlí 2010 tóku gildi ákvæði reglugerðar um alþjóðlegt reiki á almennum farsímanetum innan EES-svæðisins sem gengur enn lengra en fyrri reglugerð um sama efni frá árinu 2008. Helstu nýmæli eru þau að sett er hámarksverð, € 0,15, á SMS smáskilaboð auk þess sem fjarskiptafyrirtækjum er gert að upplýsa neytendur um gjaldskrá fyrir gagnatengingar og setja sjálfvirkt hámark á reikigagnaþjónustu. Samkvæmt reglugerðinni er einnig óheimilt að innheimta gjald fyrir að taka á móti talhólfsskilaboðum. Auk þess er verð fyrir símtöl sem hringd eru í reikiþjónustu innan EES-svæðisins lækkuð úr € 0,46 í € 0,39 og heildsöluverð á reikigagnaþjónustu í farsíma eða með 3G nettengli úr € 1 í € 0,8 fyrir hvert MB. Þá er farsímafyrirtækjum einnig gert skylt að breyta tímamælingum símtala í farsíma milli landana þannig að fyrst er leyfilegt að taka gjald fyrir 30 sekúndna lágmarksnotkun og síðan skal taka gjald fyrir hverja sekúndu eftir það. Kostnaður við símtöl milli landa getur verið afar hár og hefur oft verið erfitt fyrir neytendur að fylgjast með verðlagningu þeirra. Í október 2008 tók gildi á Íslandi reglugerð nr. 1046/2008 um alþjóðlegt reiki innan EES-svæðisins sem hafði það markmið að tryggja að notendur almennra farsímaneta á ferðalagi innan EES-svæðisins greiði ekki óhóflegt verð fyrir reikiþjónustu þegar þeir hringja eða taka á móti símtölum í farsímaþjónustu. Þann 1. júlí 2010 tók síðan gildi ákvæði reglugerðar nr. 183/2010 um breytingar á reglugerð nr. 1046/2008 um alþjóðlegt reiki á almennum farsímanetum innan EES-svæðisins sem gengur enn lengra í þessum efnum. Í reglugerðinni er vikið að allmörgum atriðum sem fyrirtækjum á farsímamarkaði er gert skylt að uppfylla og gildir hún bæði um samskipti á milli fjarskiptafyrirtækjanna, þ.e. á heildsölumarkaði, sem og varðandi ýmsa þjónustu sem fyrirtækjum er gert skylt að veita notendum þjónustunnar, þ.e. á smásölumarkaði. Þau skilyrði sem sett eru fram í reglugerðinni höfðu sum hver verið uppfyllt af farsímafyrirtækjunum áður en reglugerðin tók gildi en til þess að fá skýra mynd af stöðunni eins og hún er í dag gerði Póst- og fjarskiptastofnun úttekt á því hvernig fyrirtækin hafa staðið að því að uppfylla þær skyldur sem lagðar eru á þau með reglugerðinni. Niðurstöður úttektarinnar má sjá hér. Þar er einnig að finna nánari upplýsingar um ákvæði reglugerðarinnar. Almennt má segja að íslensku farsímafyrirtækin séu langt á veg komin með að uppfylla skilyrði reglugerðarinnar. Síminn og Vodafone uppfylla ákvæði hennar að fullu og önnur félög eru komin langleiðina í þeim efnum. Í þeim tilvikum þar sem ákvæði reglugerðarinnar hafa ekki verið innleidd að fullu hjá viðkomandi farsímafyrirtæki verður fyrirtækið sjálft að bera hallan af því, en óheimilt er að innheimta hærra gjald af neytendum en kveðið er á um í reglugerðinni. Úttekt á framkvæmd reglugerðar um alþjóðlegt reiki á almennum farsímanetum (pdf)
16. júlí 2010
Ákvörðun PFS um útnefningu á farsímamarkaði 7
Nánar
Póst- og fjarskiptastofnun birtir í dag ákvörðun sína varðandi heildsölu á farsímamarkaði. Samkvæmt ákvörðuninni skal jafna og lækka verð heildsöluþjónustu um 50% til 67% úr 7,49 krónum annars vegar og 12 krónum hins vegar í 4 krónur í þrepum á næstu tveimur og hálfu ári. Upphafsgjöld verða afnumin. Ákvörðunin nær til allra farsímanetrekenda hérlendis, þ.e. Símans, Vodafone, Nova og IMC/Alterna, en tvö síðastnefndu fyrirtækin báru ekki sérstakar kvaðir áður. Í lok tímabilsins munu öll félögin hafa sama hámarksverð á heildsöluverði farsímaþjónustu (s.k. lúkningarverði). Þessi breyting leiðir m.a. til þess að ein meginforsendan fyrir mismunandi verði á farsímaþjónustu þegar hringt er í annað farsímafélag verður ekki lengur til staðar. Póst- og fjarskiptastofnun (PFS) hefur nú lokið greiningu á markaði fyrir lúkningu símtala í einstökum farsímanetum (markaður 7). Á grundvelli niðurstaðna úr markaðsgreiningunni hefur PFS ákveðið að útnefna Símann með umtalsverðan markaðsstyrk í lúkningu símtala í eigin GSM (2G og 3G) og NMT farsímanet, Vodafone í eigin GSM farsímanet (2G og 3G), Nova í eigin GSM farsímanet (3G) og IMC/Alterna í eigin GSM farsímanet (2G). Samkeppnisvandamál sem PFS hefur greint á viðkomandi mörkuðum má fyrst og fremst rekja til þess að farsímafyrirtækið sem ræður yfir netinu sem símtalinu er lokið í, er með einokunarstöðu á viðkomandi markaði. Flest samkeppnisvandamálin tengjast lúkningarverði. Að mati PFS á sér stað yfirverðlagning á símtölum milli kerfa. Kostnaðinum er þannig velt yfir á þá notendur sem eru tengdir öðrum farsíma- eða fastlínunetum. PFS hefur ákveðið að leggja kvaðir á Símann vegna 2G og 3G farsímanets félagsins um aðgang, jafnræði, bókhaldslegan aðskilnað, eftirlit með gjaldskrá og kostnaðarbókhald. Sömu kvaðir eru lagðar á Vodafone að undanskyldri kvöð um kostnaðarbókhald. Þá eru lagðar kvaðir á Nova og IMC/Alterna um aðgang, jafnræði og eftirlit með gjaldskrá. Á grundvelli kvaðar um eftirlit með gjaldskrá í GSM/UMTS farsímanetum hefur PFS ákveðið að leggja þær skyldur á farsímafélögin að lækka og jafna gjaldskrá fyrir lúkningarverð í eigin GSM/UMTS farsímanetum úr 7,49-12 kr. í 4 kr. í fjórum þrepum fram til ársloka 2012, sbr. neðangreinda töflu. Lækkun lúkningarverða í GSM/UMTS farsímanetum fram til 1. janúar 2013 Fyrirtæki Eining Verð fráákvörðun Verð frá1.9.2010 Verð frá1.1.2011 Verð frá1.1.2012 Verð frá1.1.2013 Síminn kr./mín. 7,49 6,5 5,5 4,5 4,0 Vodafone kr./mín. 7,49 6,5 5,5 4,5 4,0 Nova kr./mín. 12,0 10,3 8,3 6,3 4,0 IMC/Alterna kr./mín. 12,0[1] 10,3 8,3 6,3 4,0 [1] Lúkningarverð IMC er 12 kr. gagnvart öðrum en Símanum. Lúkningarverð gagnvart Símanum er 7,49 kr. vegna símtala sem eiga sér upphaf í talsímaneti og/eða NMT neti Símans, en símtöl úr farsímaneti Símans sem enda í kerfi IMC eru verðlögð eins og um sé að ræða innankerfissímtöl í farsímaneti Símans, þ.e. upphaf og lúkning símtals er verðlagður á 6,53 kr. Um verður að ræða hámarksverð og er félögunum því heimilt að bjóða lægri verð ef slíkt er í boði fyrir alla aðila (jafnræðiskvöð). Borið hefur á kvörtunum og óánægju frá neytendum um að þeir eigi erfitt með að greina kostnað fyrir farsímaþjónustu þegar hringt er á milli neta annars vegar og innan nets viðkomandi farsímafélags hins vegar, en síðarnefndu símtölin eru oft án endurgjalds. Með því að jafna lúkningarverð er ein meginforsendan fyrir mismunandi verðlagningu fyrir símtöl innan og utan kerfa farsímafélaganna og hinu flókna og ógagnasæja verðfyrirkomulagi ekki lengur til staðar. Þess skal þó getið að um er að ræða heildsöluverðlagningu milli farsímafélaganna sem þarf ekki að endurspeglast alfarið á smásölumarkaði en að mati PFS eru allar forsendur til staðar fyrir verðlækkanir og einfaldari gjaldskrár á smásölumarkaði í kjölfar lækkana lúkningarverða á heildsölustigi. Markmið fjarskiptalöggjafarinnar og PFS með markaðsgreiningum er að greina stöðu samkeppni á hinum ýmsu undirmörkuðum fjarskiptamarkaðarins og leggja á viðeigandi kvaðir til að efla samkeppni, sé hún ekki talin vera nægjanlega virk eins og sú niðurstaða sem nú liggur fyrir gefur til kynna. Það er von stofnunarinnar að með þessu mikilvæga skrefi muni samkeppni á farsímamarkaði eflast enn frekar, neytendum til hagsbóta. Þar sem markaðsgreiningar eru viðvarandi verkefni PFS má búast við fleiri ákvörðunum stofnunarinnar á næstu misserum í framhaldi af greiningu annarra hluta fjarskiptamarkaðarins. Markaður fyrir aðgang og upphaf símtala í almennum farsímanetum næstur í röðinni. Ákvörðun nr. 18/2010 Viðauki A - Greining á heildsölumarkaði fyrir lúkningu símtala í einstökum farsímanetum(Markaður 7) Viðauki B - Niðurstöður úr samráði PFS um frumdrög að greiningu á heildsölumörkuðum fyrir lúkningu símtala í einstökum farsímanetum (markaður 7) Viðauki C - Álit Eftirlitsstofnunar EFTA (ESA)
16. júlí 2010
PFS framlengir samráðsfrest vegna boðaðra breytinga Íslandspósts á skilmálum um póstþjónustu
Nánar
Póst- og fjarskiptastofnun hefur ákveðið að framlengja samráðsfrest vegna boðaðra breytinga Íslandspósts á skilmálum um póstþjónustu sem tilkynnt var um 29. júní s.l. Athugasemdir hagsmunaaðila skulu berast stofnuninni eigi síðar en þriðjudaginn 3. ágúst n.k.
30. júní 2010
PFS efnir til samráðs um reglur um forval og fast forval í talsímanetum
Nánar
PFS hefur gert drög að nýjum reglum um forval og fast forval í talsímanetum í samræmi við 4. mgr. 53. gr. laga nr. 81/2003 um fjarskipti. Í samræmi við 6. gr. laga nr. 69/2003 um Póst- og fjarskiptastofnun óskar stofnunin hér með eftir umsögnum hagsmunaaðila vegna ofangreinds. Reglunum er ætlað að leysa af hólmi eldri reglur um sama efni nr. 280/2002. Frestur til þess að koma að rökstuddum tillögum eða athugasemdum við meðfylgjandi drög er gefinn til 21. júlí n.k. Sérstakar fyrirspurnir vegna ofangreinds má senda á netfangið oskarh@pfs.is en athugasemdir og rökstuddar tillögur skulu sendar formlega til PFS fyrir ofangreindan svarfrest. Drög að reglum um forval og fast forval í talsímanetum (PDF) Drög að reglum um forval og fast forval í talsímanetum - Skjal með sýnilegum breytingum (PDF)
29. júní 2010
Héraðsdómur Reykjavíkur sýknar Póst- og fjarskiptastofnun fyrir hönd Jöfnunarsjóðs alþjónustu
Nánar
Héraðsdómur Reykjavíkur hefur með dómi, dags. 25. júní s.l. sýknað Póst- og fjarskiptastofnun f.h. Jöfnunarsjóðs alþjónustu, af kröfu Símans um greiðslu dráttarvaxta af ákvörðuðu framlagi til handa fyrirtækinu vegna veitingar gagnaflutningsþjónustu með 128 Kb/s flutningsgetu. Hið ákvarðaða framlag var til komið vegna alþjónustukvaðar á fyrirtækið á árinu 2005. Sjá dóminn í heild:Dómur Héraðsdóms Reykjavíkur í máli Símans gegn Póst- og fjarskiptastofnun f. h. Jöfnunarsjóðs alþjónustu (PDF)