Fréttasafn
12. apríl 2005
Og fjarskiptum hf. skylt að gæta jafnræðis
Nánar
Póst- og fjarskiptastofnun (PFS ) hefur ákvarðað að Og fjarskiptum hf. (Og Vodafone) sé skylt sem fyrirtæki með umtalsverða markaðshlutdeild á farsímamarkaði að gæta jafnræðis, sbr. 25. gr. fjarskiptalaga nr. 107/1999, að því er varðar svokallaða lúkningu símtala inn á farsímanet fyrirtækisins. Sú skylda nái m.a. til þess að sama gjald skal tekið óháð því úr hvaða neti símtalið er upprunið. Ber Og fjarskiptum að bókfæra sölu á lúkningu til fastanets fyrirtækisins á sama verði og til annarra fyrirtækja. Og fjarskiptum hf. er veittur 30 daga frestur frá dagsetningu ákvörðunar Póst-og fjarskiptastofnunar 11.apríl til að sýna fram á með fullnægjandi gögnum að fyrirtækið hafi látið af mismunun í verðlagningu á lúkningu í farsímaneti fyrirtækisins. Að öðrum kosti mun PFS grípa til viðeigandi ráðstafana skv. 3. mgr. 73. gr. laga nr. 81/2003. Ákvörðun Póst- og fjarskiptastofnunar á sér nokkra forsögu. Síminn krafðist þess í október 2003 að PFS beindi þeim fyrirmælum til Vodafone að láta af mismunun í verðlagningu. Vodafone gerði þá mótkröfu að kröfu Símans yrði hafnað. Greindu menn á um túlkun laga um skyldur fyrirtækja með umtalsverða markaðshlutdeild að gæta jafnræðis. Vodafone hélt því fram að kvöð um jafnræði hefði ekki stofnast sjálfkrafa við ákvörðun PFS um að fyrirtækið hefði markaðsráðandi hlutdeild. Einnig að ekki fælist í 1. mgr. 25. gr. fjarskiptalaga 107/1999 skylda til að gæta jafnræðis í verði. Síminn hélt því hins vegar fram að skylda til jafnræðis hefði stofnast 15. júlí 2003 þegar Vodafone var úrskurðað með umtalsverða markaðshlutdeild á markaði fyrir farsímanet og farsímaþjónustu. Það er álit Póst- og fjarskiptastofnunar að skyldur fyrirtækja um aðgang og samtengingar hvíli sjálfkrafa á fyrirtækum sem úrskurðuð hafa verið með umtalsverða markaðshlutdeild. Það er jafnframt álit PFS að einn mikilvægasti þátturinn í samningum um samtengingu sé verð. Það sé því ekki hægt að líta svo á að fyrirtæki gæti jafnræðis með tilliti til samtenginga sem þau bjóða, ef þau mismuni í þeim mikilvæga þætti sem verðið er. Sjá úrskurð Póst- og fjarskiptastofnunar
5. apríl 2005
Ný tímaáætlun fyrir markaðsgreiningu
Nánar
Ný tímaáætlun fyrir markaðsgreiningu Póst- og fjarskiptastofnun hefur gert nýja áætlun um markaðsgreiningu. Tímasetningar hafa verið endurskoðaðar í ljósi fenginnar reynslu, en verkið hefur reynst mjög umfangsmikið og tímafrekt. Athygli er vakin á því að röð markaða hefur verið breytt nokkuð frá fyrri áætlun. Sjá nýja tímaáætlun fyrir greiningu á fjarskiptamarkaði.
1. apríl 2005
UHF-tíðnir fyrir stafrænt sjónvarp boðnar út
Nánar
Útboðsauglýsing UHF tíðnir fyrir stafrænt sjónvarp á landsvísu skv. DVB-T staðli - I. áfangi Póst- og fjarskiptastofnun auglýsir með vísan til 9. og 11. gr. laga um fjarskipti nr. 81/2003 eftir tilboðum í UHF rásir til stafrænna sjónvarpsútsendinga með DVB-T tækni. Með útboðinu er fyrirtækjum gert kleift að byggja upp stafrænt sjónvarpsdreifinet á landsvísu. Stefnt er að því að sem flestir landsmenn eigi innan tveggja ára kost á að taka á móti stafrænum sjónvarpssendingum með DVB-T tækni. Ekki verður boðið í gjald fyrir réttindi til tíðninotkunar. Aðrar þættir ráða vali milli bjóðenda, s.s. útbreiðsla sendinga og þjónusta við notendur. Að þessu sinni verður úthlutað allt að 10 rásum. Hver bjóðandi getur sótt um 2 rásir að hámarki. Þó má sækja um eina rás til viðbótar ef dreifa á háskerpusjónvarpi (HDTV) fyrir eina eða fleiri dagskrár, innan tveggja ára frá úthlutun tíðniréttinda. Gerð er krafa um lágmarksútbreiðslu: Að dreifinetið nái að lágmarki til 40 sveitarfélaga innan eins árs frá úthlutun réttinda. Að dreifinetið nái að lágmarki til 98% heimila í landinu innan tveggja ára. Nánari upplýsingar og skilmála er að finna í útboðslýsingu - (pdf-snið).Útboðslýsing í word-skjaliFylgiskjal 1Fylgiskjal 2Fylgiskjal 3Fylgiskjal 4Einnig má fá útboðslýsingu á skrifstofu stofnunarinnar.Tilboðsfrestur er til 17. maí 2005, kl. 11:00.
31. mars 2005
Íslendingar virkir þátttakendur í nýrri Evrópustofnun um netöryggi
Nánar
Íslendingar og aðrar EFTA-þjóðir verða virkir þátttakendur í nýrri Evrópustofnun um net- og upplýsingaöryggi sem er að taka til starfa. Stofnunin ENISA (European Network and Information Security Agency) á að tryggja öryggi í netþjónustu og gagnaflutningum á evrópska efnahagssvæðinu, samræma lög og reglur og veita stjórnvöldum, stofnunum og fyrirtækjum sérfræðiráðgjöf. Að tillögu samgönguráðherra samþykkti íslenska ríkisstjórnin aðild að ENISA-stofnuninni í mars 2004, en þá lá fyrir formleg ákvörðun hjá framkvæmdastjórn ESB um að koma henni á fót. Í byrjun þessa árs tókust samningar um að EFTA-ríkin fengju fulltrúa í stjórn stofnunarinnar, en þau höfðu lagt mikla áherslu á að öðlast slíkan sess. Fulltrúar Íslands, Lichtenstein og Noregs sóttu nýlega fyrsta stjórnarfund ENISA, en afar brýnt er að EFTA-ríkin séu virkir þátttakendur í þessu samstarfi, fylgist náið með nýjungum og afli og miðli upplýsingum til hagsmunaaðila á markaði. Þetta er ekki síst knýjandi nauðsyn fyrir Íslendinga, sem samkvæmt alþjóðlegum könnunum standa flestum þjóðum framar í að nýta tölvu- og upplýsingatækni. Alþjóðlegt samstarf um net- og upplýsingaöryggi (UT-öryggi) er lykilatriði ef takast á að afstýra skemmdarverkum og tryggja áreiðanlega gagnaflutninga á Netinu, til hagsbóta fyrir neytendur, fyrirtæki og stofnanir. Á þessu ári verður megináherslan lögð á að skipuleggja starfsemi ENISA til frambúðar og mun sú vinna byggja á niðurstöðum ítarlegrar könnunar sem nýlega var gerð í stjórnsýslu allra ríkja á evrópska efnahagssvæðinu. Ráðnir verða 44 starfsmenn, flestir í apríl 2005, og er stefnt að því að starfsemin verði komin á fullt skrið síðla árs. Stofnunarinnar bíða viðamikil verkefni m.a. við að samræma stefnuna, en skoðanir aðildarríkja á því hvernig beri að forgangsraða verkefnum eru eðlilega afar ólíkar. Sjá frekari upplýsingar um ENISA Einnig veitir Hörður Halldórsson, Alþjóðadeild PFS upplýsingar í síma: 5101500
30. mars 2005
Kvaðir um alþjónustu takmörkunum háðar
Nánar
Fjarskiptalög nr. 81 frá árinu 2003 heimila ekki, líkt og fullyrt var í leiðara Morgunblaðsins 30. mars, að leggja megi á Landsímann eða önnur fjarskiptafyrirtæki útvíkkaðar kvaðir um að veita þjónustu umfram alþjónustu, t.d. þá að koma upp breiðbandstengingum í dreifbýli. Íslensk fjarskiptalög taka mið af alþjónustutilskipun Evrópusambandsins nr. 2002/22/EB. Í henni er alþjónusta skilgreind sem sú lágmarksþjónustu sem stjórnvöldum er skylt að tryggja öllum þegnum á viðráðanlegu verði, óháð landfræðilegri staðsetningu. Þetta er gert með því að leggja kvaðir á fyrirtæki sem rekur fjarskiptanet- eða þjónustu. Þar sem tilskipun Evrópusambandsins nr. 2002/22/EB heimilar ekki aðrar kvaðir en þær sem þegar eru innleiddar í íslensk lög verður að leita annarra leiða en útvíkka alþjónunstukvaðir, vilji íslensk stjórnvöld bæta fjarskiptaþjónustu. Má þar t.d. benda á 23. grein fjarskiptalaga þar sem samgönguráðherra er heimilt að leggja í framkvæmdir, rekstur eða þjónustu sem er til almannaheilla, í öryggisskyni, af umhverfisástæðum eða samkvæmt byggðasjónarmiðum, ef ætla má að fjarskiptaþjónustan skili ekki arði, án þess þó að um alþjónustu sé að ræða. Samkvæmt gildandi lögum telst alþjónusta vera talsímaþjónusta, almenningssímar, handvirk þjónusta og þjónusta við öryrkja eða notendur með sérstakar þjóðfélagsþarfir. Einnig gagnaflutningsþjónusta með allt að 128 kbps hraða. Kvöðin um alþjónustu er nú lögð á Landssímann og er hún nánar skilgreind í rekstrarleyfi útgefnu í janúar 2002. Alþjónusta, samkvæmt ofangreindri skilgreiningu, er veitt hérlendis, ef undan eru skildir um 70 sveitabæir sem ekki njóta 128 kbps tengihraða. Er nú verið að kanna með hvaða hætti bæta megi þar úr, en kostnaður við hverja tengingu getur numið á aðra milljón króna.
15. mars 2005
Fjarskiptatækni vel nýtt á Íslandi
Nánar
Íslendingar eru í öðru sæti yfir þjóðir heims sem nýta vel nýja upplýsinga- og fjarskiptatækni. Þetta kemur fram í árlegri skýrslu Alþjóðaefnahagsráðsins (World Economic Forum) sem nær til 104 landa. Singapúr er í efsta sæti listans. Í fyrra voru Íslendingar í tíunda sæti listans, en hafa nú fært sig upp í annað sætið. Aðrar Norðurlandaþjóðir standa einnig vel að vígi. Finnar eru í þriðja sæti, Danir í því fjórða og Svíar í sjötta sæti. Skýrsluna Global Information Technology Report 2004-2005 má sækja á heimasíðu World Economic Forum
8. mars 2005
Tvær athugasemdir vegna útboðs á UHF-rásum
Nánar
Ríkisútvarpið og 365-ljósvakamiðlar ehf. hafa skilað inn athugasemdum vegna fyrirhugaðs útboðs á 10 UHF rásum fyrir stafrænt sjónvarp, en frestur til þess rann út 1. mars. Hér má lesa þær athugasemdir sem bárust: Frá Ríkisútvarpi Frá 365-ljósvakamiðlum
8. mars 2005
Athugasemdir RÚV
Nánar
Athugasemdir Ríkisútvarpsins við drög að auglýsingu um fyrirhugað útboð á UHF tíðnum fyrir stafrænt sjónvarp skv. DVB-T staðli. Töluliðir hér á eftir vísa til sömu töluliða í drögunum. 1. Markmið útboðs Meðan hugtakið “sem flestir landsmenn” er ekki skilgreint, eru 2 árin í lagi, sem æskilegt markmið, en útbreiðsluhraðann í 6. grein teljum við full brattann. 2. Rásir sem verða í boði Við notkun rásanna ættu DVB-T útsendingar að hafa forgang 1, en hins vegar ættu aðrar gagnaútsendingar að vera heimilar með víkjandi hætti (forgangur 2). Þetta kemur t.d. dreifðum byggðum í Noregi til góða, sem hafa ekki aðra möguleika á háhraðatengingu. Tiltaka ætti hvaða verndar úthlutaði rásalistinn kemur til með að njóta af hálfu Póst- og fjarskiptastofnunar, þ.e. hvaða “protection ratio” P&f fer eftir í sínum úthlutunum. Ekki eru VHF rásir nefndar, en þær geta hentað sums staðar betur en UHF rásir og unnt er að gera kröfur um að aðgangskassar geti tekið á móti þeim. 3. Framkvæmd útboðs Við úthlutun ætti ennfremur að taka tillit til að Ríkisútvarpið hefur skyldur við almenning í landinu umfram aðra skv. útvarpslögum, hvort sem um er að ræða á svæðum sem standa undir sér markaðslega eða ekki. Vegna skyldna Ríkisútvarpsins umfram aðra til að koma dagskrám sínum til alls landsins og næstu miða, hvort sem það stendur undir sér markaðslega eða ekki, telur Ríkisútvarpið nauðsynlegt að vanda til hönnunar stafræns dreifikerfis, til að halda stofnkostnaði og framtíðar rekstrarkostnaði í lágmarki. Því teljum við fyrirhugaðan 6 vikna tilboðsfrest of skamman og viljum frá ráðrúm til tilraunasendinga áður en endanleg hönnun dreifingarinnar er afráðin. Annað hvort mætti lengja tilboðsfrestinn eða heimila að leggja fram drög að hönnun, þótt lokahönnun kæmi síðar. Til að flýta málinu vísum við til umsóknar okkar um slíkar tilraunasendingar dags. 4. maí 2004, sem ekki hefur verið svarað. Við förum þess hér með á leit, að fá jákvætt svar, eða til vara UHF rás 22 til þessara tilrauna. 5. Útbreiðslusvæði Til að geta gert tímaáætlanir þurfa nánast að liggja fyrir samningar eða tilboð frá framleiðendum um afhendingartíma. 6 vikur er full knappur tími til þess, sbr. t.d. útboðsskyldur RÚV sem opinberrar stofnunar. Venjulegast er að með lágmarkssviðsstyrk sé átt við miðgildis sviðsstyrk (median field strength) í 10m hæð yfir jörð, miðgildi í merkingunni 50% staða yfir og 50% staða undir sviðsstyrksgildinu. Tilgreina þarf hvort P&f á við þetta eða eitthvað annað. Einnig er í erlendum viðmiðum, ekki notaður sami viðmiðunarstyrkur fyrir neðri og efri hluta UHF sviðsins. Eitt viðmið sem við höfum sér er t.d. 52 dB/uV/m í bandi IV og 56 dB/uV/m í bandi V. Enn fremur kann viðmiðunarstyrkur að vera háður vali á mótunartegund, sem ætti að endurspeglast í lágmarkssviðsstyrk. 6. Útbreiðsluhraði Lágmarkskröfur um uppbyggingarhraða samkvæmt drögunum eru mjög strangar. DVB-T kerfi á þessu tíðnisviði hefur ekki verið byggt fyrr á Íslandi og ef bygging þess hæfist utan SV-lands (frá Akranesi til Suðurnesja) eru bæði mörkin of ströng. Lagt er til að bæði mörkin verði aukin um tvö ár. Fh. Ríkisútvarpsins, Eyjólfur Valdimarsson, forstöðumaður þróunarsviðs